اسكريبت كامل

أنا مش هيشدني غير راجل مختلف.. مش عسول!
وإيه المختلف بالنسبالك يا مريم
ابتسمت وأنا ببص بعيد بهدوء
المختلف هو اللي هيدور عليا يا رحمة مش أنا اللي هدور عليه.
كنت بلبس الچاكيت البامب بتاعي وبلف الطرحة قبل ما أقفله لبست بوت صغير ونزلت علشان أجيب طلبات من السوبر ماركت الرئيسي اللي على أول الشارع بتاعنا.. كنت ببص على تاريخ الإنتاج وعلى الشركة المنتجة علشان أعرف مقاطعة ولا لأ ولأني عندي هوس من الاسماء الغريبة والتواريخ القديمة.
هو حضرتك هتطولي كتير عند الرف ده
لفيت ضهري لقيت شخص شكله طويل أوي أو أنا اللي قصيرة أوي مش عارفة!

أنا همشي حالا.
بصيت على كيس النسكافية اللي كان في إيدي ورجعته تاني على الرف وأنا بتنهد بزعل بسيط فكمل هو بذوق
لو عايزة تدوري براحتك أنا ممكن أخد لفتي وأرجع تاني مفيش أي مشكلة.
بصيت له وابتسمت
لأ مفيش مشكلة..
لأ خليك عادي يعني كده كده لسه ليستة الطلبات بحالها.
حركت راسي بهدوء
فعلا مش هضايق ولا هتقل عليك
حرك راسه بنفي
لأ إطلاقا.. تقدري تاخدي راحتك.
حركت راسي بابتسامة بعبر فيها عن إمتناني
متشكرة جدا.
لفيت وشي تاني وأنا بدور على نسكافية ميكنش شكله غير مريح وفي نفس الوقت يكون مش تبع المقاطعة أنا أعرف أتنين سوبر ماركت قبل ده.. بس ده أكتر واحد فيهم نضيف وأكتر واحد فيهم فيه منتج..
يا خبر!
فتحت عيني پصدمة لما افتكرت إني كنت بعمل كوباية شاي بقالي ساعة وإني مش متأكدة إذا كنت قفلت الغاز ولا لأ.. وكمان.. وكمان أنا غسلت إيدي! مش متأكدة إذا كنت قفلت محبس المية ولا نسيت.. يارب الشقة متكنش ڠرقت.
رميت السلة اللي بجيب فيها الحاجة وجريت بسرعة الشقة وأنا بطلع المفتاح من جيبي.. كنت بتنفس بصعوبة دخلت بسرعة المطبخ.. لقيت الكوبايات مغسولة كاملة والغاز مقفول وحتى كوباية الشاي غسلتها قبل ما أنزل.. دخلت الحمام فلقيتني قافلة المحبس اتنهدت بتعب وبعدين بحط إيدي في جيبي ملقيتش التليفون.. خرجت بسرعة وأخدت المفتاح وقبل ما أنزل السلم لقيتني قعدت على السلم وبدأت أعيط بسكون كنت ضامة رجلي وحضناهم بأيدي وبدأ جسمي يرتعش وأنا بتحرك بشكل عشوائي متوتر.
أنت كويسة أنا لقيتك جريت و..
أول ما شاف شكلي جري بسرعة على السلم وقعد قدامي
فيه إيه بس إيه اللي حصل حد ضايقك في السوبر ماركت
حركت راسي بنفي وكملت وأنا بعيط
تليفوني.. تليفوني نسيته هناك.
مد إيده في جيبه وخرج منه التليفون ومدهولي
أهدي بس مفيش حاجة حصلت.. أهدي شوية.
أخدت منه الموبايل فطلع من الشنطة اللي معاه ازازة ومدهالي
اشربي وأهدي..
بصيت للأزازة بشك أنا معرفهوش.. ده شخص غريب ولو أفترضنا حسن النية فأنا برضوا معرفش هو الازازة مسكها ازاي ومعرفش هو اتعامل معاها بأنهي شكل.. حركت راسي برفض وكملت
أنا كويسة.. شكرا.
بص لحركات وشي وكمل
متأكدة
حركت راسي بإيجاب وكنت هقف فوقعت تاني قام وقف وكمل وهو بيمدلي إيده
هاتي إيدك...
بصيت بنفي وأنا بضغط على أعصابي علشان أقوم فكنت هقع بحركة تلقائية منه مسكني وكمل
أنت كويسة فعلا محتاجة أجيبلك اي حاجة!
حركت راسي بنفي وبعدت عنه
أنا كويسة بجد متقلقش أعتقد أتوترت شوية بس.. متشكرة جدا تعبتك معايا.
ابتسم وكمل
ولا شكر ولا حاجة.. أنا أدهم جاركم الجديد.
حركت راسي بهدوء
في الشقة دي صح
حرك راسه بهدوء فكملت
أهلا يا أدهم نورت.
من بعد مۏت بابا وماما اتعودت على العيشة الهادية.. أو المتوحدة معرفش الشقة اللي في وشنا عزلت من بدري ويجوز دي أول مرة يجي شخص يسكنها عمارتنا أصلا هادية مفيهاش مشاكل ولا حوارات بابا كان شاري الشقة دي ملك فمقدرتش أخرج وأسيبها خاصة إني معنديش أهل تانين ولا حد أروحله رحمة كل يومين بتيجي تبات معايا يوم أو يومين وبتمشي وباقي الوقت بقضيه لوحدي.
أنت مش قادرة تفتحيه
حركت راسي بهدوء
لو ممكن بس تفتحهولي
حرك راسه بأدب وكمل وهو بياخده مني
أكيد حاضر..
رجعت خطوتين لورا علشان اسمحله يطلع فتح الباب ومدلي المفتاح وشنطة
دي الحاجة اللي اشتريتيها أنا حاسبتلك عليها وجبتهالك.. أنا ساكن ومعايا ماما وأختي فمتتخضيش لو مامتي وهي قاعدة لوحدها رنت عليك.
ابتسم ببساطة ومشي فكملت بسرعة