اسكريبت كامل بقلم حنان محمد

 

زهقت ونزلت اتمشى، كل الاماكن بتفكرنى بيه و بفتكر كلامنا مع بعض وهزارنا وضحكنا، انا كنت بتحمل كل حاجه مش مرتاحه ليها عشان هوا موجود وبيهون عليا مراره الدنيا، ليه من يوم وليله كل حاجه تختفى.

فاتت اول سنه في الكليه وبدأت اتعرف ع ناس جديده، وفي اخر النهار بفتقده حتى مش معايا اي حاجه اتواصل معاه بيها حتى معرفش عنوانهم الجديد  وخاېفه اسال اهلى .

عدا سنه ونص وانا واقفه مكانى غلاوته في قلبى بتزيد مبتقلش لسه لما بروح الاماكن بتاعتنا بعيط ع فقدانه، ليه لسه بكلمه في اخر الليل وبحكى ليه كل حاجه، ليه بكتبله جوابات 

مليون سؤال محكوم ب بدايه ليه؟ 
معقول اكون الطرف اللي غلط وحب...؟!

- البنات كلها بتتخطب انتى بقيتى في تانيه جامعه وداخله ع تالته 
- ما انا مبرتاحش لحد يا ماما 
- هوا انتى بتشوفيهم عشان ترتاحى ولا لا اصلا!! 
بصيتلها وسكت اصلها معاها حق 
طلعت برا وقبل ما تقفل باب الاوضه 
- اللى مستنياه مش هيجى، متفكريش كتير وابدئى حياتك 
وقفلت الباب

ف واقفت، قولت اجرب يمكن ارتاح يمكن انسى يمكن قلبى يتفتح من تانى، يمكن كل حاجه تهون، مش يمكن...؟

- الدبله دى ولا دى 

- كنت سرحانه ف هزت كتفى... هااا 
- مرتاحه...؟ 
- لما قالت الكلمه دى افتكرته، هوا دايما يقولها ليها لما اعمل اي حاجه جديده ياترى هوا فين دلوقت، ياترى هوا بيعمل ايه، مبسوط ولا حياته واقفه زيي كدا! 
لقيتنى بعيط، وقتها امى اخدتنى في حضنها وروحنا والخطوبه انتهت قبل ما تبدتى

من وقتها وهيا عمرها ما فتحت معايا الموضوع دا

النهارده هتخرج فات اربع سنين وانا بتعلم وطالع عينى في الكليه 
وفات اربع سنين ع فراقه ليا..

- فيه عريس 
- كدا الفصوليا تقطيعها حلو ولا طويله 
- بقولك فيه عريس 

- الصلصه هتتحرق يا ماما 
- حناان!!! 
- خليه يجى بكرا 
- بجد! 
- ابتسمت... اه بجد

فات اربع سنين اظن كفايه ولازم ابدأ حياتى من جديد بقى ولا ايه 
ليه افضل افكر في حد يمكن اكون ولا ع باله اصلا 
ليه اعلق نفسى بحاجه تكاد تكون مستحيل انها تحصل 
ليه بس..

- البس الطرحه دى ولا دى 
- الاتنين حلوين 
- انهى واحده لايقه ع الطقم طيب 
- صدقينى مش هتفرق 
- اطلعلهم بالاسدال طيب ولا ايه ما تختارى يا ماما 
- يلا عشان تطلعى

طلعت وقعدت وماما قامت وبابا مكانش موجود تقريبا كان في الصاله..

كنا ساكتين ومحدش بيتكلم...
قررت اقطع الصمت واتكلم 
- عايز تسالنى ع حاجه...؟ 
- لاحظت حركه رجله اللي بتدل ان هوا متوتر.. معقول اكون الشخص اللي غلط  وحب ...؟

- رفعت عينى ليه وانا ببتسم لقيته هوا، دقنه طلعت ملامحه بقت قاسيه شويه شكله اتغير بس مش كتير لسه ملامحه حلوه

-  مجاوبتيش...؟

بصيتله وضحكت ومش مستوعبه انه قدامى او انه كان بيحس بنفس الاحساس.

- كنت عايز اخلص الكليه واجيلك واقولك عملت ايه في الاربع سنين بتوع الجامعه انا مسجلهم كلهم وكاتب مذكرات

- وبس!!

- وعشان وحشتينى انتى وهزارك وتأخيرك وبهدلتك ورغيك ونومك ع كتفى وكله كله 
-...
- مرتاحه...؟  
- صاحب السؤال بقى ليا ازاى مبقاش مرتاحه.. 

حنان محمد